Panchakanya: ఎందరో పురుషులతో సంబంధాలు ఉన్న వీరు ఎలా పంచకన్యలుగా పూజింపబడుతున్నారు?

Panchakanya’s: భారతీయ ఇతిహాసాలు, రామాయణ మహాభారతాలు కేవలం కథలు కాదు. అవి మనిషి జీవితంలో ఉండే ఎన్నో భావోద్వేగాలను, వాటి ప్రభావాలను మనకు అర్థం చేసుకునేలా చేస్తాయి. ఈ ఇతిహాసాల్లో ఎందరో పాత్రలు ఉన్నాయి. వీళ్లందరూ మంచీ, చెడూ, ప్రేమ, కోపం, ధైర్యం, బాధ్యత, విధేయత వంటి భావాలతో ముందుకు సాగుతూ ఉంటారు. ఇవి కేవలం పురుషుల కథలే కాదు. ఇందులో స్త్రీల కథలు కూడా అంతే ప్రముఖంగా ఉంటాయి. ఈ స్త్రీ పాత్రలు కేవలం భార్యలు, తల్లులు మాత్రమే కాదు, వాటికన్నా ఎక్కువగా ఆలోచించే శక్తి సామర్థ్యాలు కలిగి ఉంటాయి. వీళ్లలో కొందరు దేవతల్లా పూజింపబడితే, మరికొందరు ఎన్నో కష్టాలు ఎదుర్కొని, సమాజానికి ఆదర్శంగా నిలుస్తారు. ఈ మహిళలందరిలో కొందరు ప్రత్యేకంగా నిలుస్తారు. వీళ్లే “పంచకన్యలు”.

“అహల్యా ద్రౌపదీ కుంతీ తారా మండోదరీ తథా

పంచకన్యా స్మరేన్నిత్యం మహా పాతక నాశనం”

అనే ఈ సంస్కృత శ్లోకం తెలుగులోకి అనువదిస్తే, “అహల్య, ద్రౌపది, కుంతి, తార, మండోదరి అనే ఐదుగురు కన్యలను నిత్యం తలుచుకుంటే మహా పాతకాలు కూడా నశిస్తాయి.” అని అర్థం. అయితే ఈ పంచకన్యలు అని పిలవబడే ఈ ఐదుగురు స్త్రీలు నిజంగా కన్యలా? ఎందరో పురుషులతో సంబంధాలు ఉన్న వీరు ఎలా కన్యలుగా పూజింపబడుతున్నారు? ఈ ప్రశ్నలకు సమాధానాలు ఈ కింద ఉన్నాయి.

పంచకన్యల జీవితం (Panchakanya’s)

సాధారణంగా కన్య అంటే పెళ్లి కానిది అని అర్థం. కానీ ఇక్కడ కన్య అనే పదానికి చాలా లోతైన అర్థం ఉంది. కన్య అంటే ఎవరికీ లొంగనిది అని అర్థం. తమ జీవితాన్ని స్వతంత్రంగా, ధైర్యంగా గడిపిన మహిళలు అని అర్థం. అటువంటి ఐదుగురు మహిళల గురించి ఇప్పుడు తెలుసుకుందాం.

అహల్య (Ahalya)

అహల్య గౌతమ మహర్షి భార్య. ఆమె చాలా అందంగా ఉంటుంది. కానీ ఆమె అందాన్ని, యవ్వనాన్ని అనుభవించలేకపోతుంది. ఇంద్రుడు గౌతముడి వేషంలో వచ్చి అహల్యను ప్రలోభ పెడతాడు. అహల్యకు ఇంద్రుడు గౌతముడు కాదు అని తెలిసినా, తనలో ఉన్న కోరికతో లొంగిపోతుంది. అయితే దీని వల్ల గౌతముడు అహల్యను శపించి శిలగా మారుస్తాడు. ఆమె చేసిన తప్పుకు శిక్ష అనుభవించినా, ఆమె కోరికలను అణచివేయకుండా, తన మనసు మాట విన్నందుకు ఆమెను కన్యగా స్మరిస్తాం.

ద్రౌపది (Draupadi)

ద్రౌపది మహాభారతంలో ఒక ముఖ్యమైన పాత్ర. ఆమె తన తండ్రిని అవమానించిన ద్రోణాచార్యుడి మీద పగ తీర్చుకోవడానికి జన్మిస్తుంది. ఆమెకు ఇష్టం లేకుండానే, అయిదుగురు పాండవుల భార్య అవుతుంది. ఆమెను దుర్యోధనుడు నిండు సభలో అవమానిస్తాడు. కౌరవులు ద్రౌపది వస్త్రాపహరణం చేస్తారు. ఆ సమయంలో పాండవులు, పెద్దలు ఎవరు సహాయం చేయలేకపోతారు. ద్రౌపది తన ఆత్మగౌరవాన్ని, తనను తాను కాపాడుకునే శక్తిని తెలుసుకుంటుంది. ద్రౌపది పడిన కష్టాలు, అవమానాలు చూసి ఎంతో మంది బాధపడతారు. కానీ ద్రౌపది ఏ కష్టానికి లొంగకుండా, తన ధైర్యంతో, పగతో ముందుకు వెళ్తుంది. అందుకే ఆమెను కన్యగా స్మరించుకుంటారు.

కుంతి (Kunti)

కుంతి పాండవుల తల్లి. ఆమె చిన్నప్పుడే సూర్యుడి వల్ల కర్ణుడికి జన్మనిస్తుంది. కానీ లోకానికి భయపడి కర్ణుడిని గంగలో వదిలేస్తుంది. తరువాత ఆమె పాండురాజును పెళ్లి చేసుకుంటుంది. ఆమెకు ఉన్న వరం వల్ల ఆమె దేవతల ద్వారా ధర్మరాజు, భీముడు, అర్జునుడు అనే ముగ్గురు కొడుకులను కంటుంది. ఆమె తన వరాన్ని మాద్రికి కూడా ఇచ్చి, ఆమె నకుల, సహదేవులను కనేందుకు సహాయం చేస్తుంది. భర్త మరణం తర్వాత కుంతి తన ఐదుగురు కొడుకులను పెంచి, వారి హక్కుల కోసం పోరాడుతుంది. కుంతి తన కష్టాలు, నష్టాలకు లొంగకుండా తన కొడుకులను పెంచి పెద్ద చేస్తుంది. అందుకే ఆమెను కన్యగా భావిస్తారు.

తార (Tara)

తార వాలి భార్య. ఆమె తెలివైనది, వివేకవంతురాలు. తన భర్త వాలికి మంచి సలహాలు ఇస్తుంది. కానీ వాలి ఆమె మాట వినడు, రాముడి చేతిలో చనిపోతాడు. తార తన భర్త మరణం తర్వాత, తన కొడుకు అంగదుడు యువరాజు అవ్వాలని, సుగ్రీవుడిని పెళ్లి చేసుకుని, కిష్కింధ రాణిగా తన బాధ్యతలను నిర్వహిస్తుంది. తార తన భర్తకు విధేయత చూపినప్పటికీ, తన కొడుకు, తన రాజ్యం బాధ్యతను నిర్వర్తించింది. అందుకే ఆమెను కన్యగా స్మరిస్తారు.

మండోదరి(Mandodari)

మండోదరి రావణుడి భార్య. ఆమె కూడా తారలాగే తెలివైనది. రావణుడు సీతను అపహరించినప్పుడు, ఆమె రావణుడికి చాలాసార్లు సీతను రాముడికి అప్పగించమని సలహా ఇస్తుంది. కానీ రావణుడు తన భార్య మాట వినడు, రాముడి చేతిలో మరణిస్తాడు. మండోదరి తన భర్త మరణం తర్వాత బాధపడినా, తన రాజ్యం లంకను కాపాడటానికి, రావణుడి తమ్ముడు విభీషణుడిని పెళ్లి చేసుకుని లంక రాణిగా కొనసాగుతుంది. మండోదరి తన కర్తవ్యాన్ని, తన రాజ్యాన్ని ఎప్పుడూ మర్చిపోదు. అందుకే ఆమెను కూడా కన్యగా భావిస్తారు.

పంచకన్యలు (Virgins) – శక్తికి స్వరూపాలు

ఈ ఐదుగురు స్త్రీలు తమ తమ జీవితాలలో ఎన్నో కష్టాలు, అవమానాలు ఎదుర్కొన్నారు. కానీ వారు ఎప్పుడూ తమను తాము కోల్పోలేదు. తమ నిర్ణయాలను, తమ ఆత్మగౌరవాన్ని వదులుకోలేదు. వీరు కేవలం భార్యలుగా, తల్లులుగా మాత్రమే కాకుండా, తమ స్వంత వ్యక్తిత్వాన్ని నిలుపుకున్నారు. అందుకే వీరిని కేవలం కన్యలుగా కాకుండా, స్త్రీ శక్తికి ప్రతీకలుగా పూజిస్తారు. వీరు తమ జీవితంలో ఎదురైన కష్టాలను ధైర్యంగా ఎదుర్కొని, తమ సొంత మార్గాన్ని ఎంచుకున్నారు. అందుకే ఈ ఐదుగురు మహిళలను మన పురాణాలు, ఇతిహాసాలు ఎప్పుడూ గుర్తుంచుకుంటాయి.